Is-sistema bipartitika wasslet għall-ħerba politika li għandna llum. Il-politiċi qegħdin hemm biex iservu lill-poplu u lis-soċjetà. Madanakollu, ċerti nies tal-business diżonesti u bla skrupli jikkontrollaw ċerti deputati miż-żewġ partiti, u saħansitra lil ministri li, min-naħa tagħhom, irriduċew dik li suppost hi l-vokazzjoni nobbli tal-politika għal eżerċizzju ta’ regħba, nepotiżmu, klijenteliżmu u favoritiżmu.

Illum, numru ta’ istituzzjonijiet tagħna mhux qegħdin jaqdu liċ-ċittadin normali. Il-ħuta’ l-kbira tibqa’ tiekol liż-żgħira. L-inugwaljanza ssaltan.

Dana wassal għal sitwazzjoni fejn numru mdaqqas ta’ Maltin iridu jitqabdu ħajjithom kollha biex ilaħħqu mal-għoli tal-ħajja. Dana kollu mhuwiex ġust.

L-elettorat Malti għandu l-għażla li jkisser din il-forma tossika ta’ politika billi jeleġġi fil-parlament kandidati b’valuri sodi li huma indipendenti u mit-tielet partit u li jiddistingwu ruħhom għall-onestà, l-integrità, il-kredibbiltà u l-konsistenza fl-imġiba tagħhom. Jekk dan ma jseħħx, nibqgħu fejn aħna.